Pentagoni: Nuk pritet luftë rajonale në Lindjen e Mesme

Departamenti Amerikan i Mbrojtjes (Pentagon) ka deklaruar se nuk pret një luftë rajonale të madhe në Lindjen e Mesme së shpejti.

Në një deklaratë me shkrim, zëvendëszëdhënësja e Departamentit të Mbrojtjes, Sabrina Singh, iu përgjigj pyetjeve të gazetarëve. Kur u pyet nëse një sulm iranian ndaj Izraelit është i afërt, Singh theksoi se ata nuk dëshirojnë të shohin një gjë të tillë dhe besojnë se një konflikt i madh rajonal nuk është në prag.

Singh shtoi se mënyra më e mirë për të ulur tensionet në rajon është arritja e një marrëveshjeje armëpushimi në Gaza dhe kthimi i pengjeve amerikanë në shtëpi.

Ajo vuri në dukje se forcat amerikane janë dislokuar në Lindjen e Mesme për të mbështetur mbrojtjen e Izraelit, për të forcuar mbrojtjen e forcave amerikane dhe për të qenë të gatshëm të reagojnë ndaj situatave të papritura.

Tensionet në rajon janë rritur pas një sulmi ajror izraelit në Bejrut që shënjestroi një komandant të lartë të Hezbollahut, Fuad Shukur, dhe vrasjes së kreut të Byrosë Politike të Hamasit, Ismail Haniyeh, në Teheran. Pas këtyre ngjarjeve, Irani dhe Hezbollahu libanez kanë kërcënuar me hakmarrje, duke fajësuar Izraelin për vrasjen e Haniyeh./bota-islame.com